रमेश रावत नेपाल पत्रकार महासंघ अछामको अध्यक्षमा निर्वाचित

अछाम । नेपाल पत्रकार महासंघ अछाम शाखाको अध्यक्ष पदमा रमेश रावत निर्वाचित भएका छन्। शुक्रबार सम्पन्न भएको निर्वाचनमा नेपाल प्रेस युनियनका तर्फबाट उम्मेदवारी दिएका रावतले ८ मतको अन्तरले विजयी हासिल गरेका हुन्। निर्वाचनमा जम्मा ६२ सदस्य रहेका भए पनि ५९ मत खसेको थियो। मतगणनामा रावतले ३३ मत प्राप्त गर्दा उनका निकटतम प्रतिस्पर्धी गीता कुँवरले २५ मत ल्याएकी छन्। एक मत भने खाली रहेको निर्वाचन समितिले जनाएको छ।

यसपटकको निर्वाचनमा रमेश रावत र गीता कुँवर दुवै नेपाल प्रेस युनियनका प्रतिनिधित्वकर्ता भएकाले प्रतिस्पर्धा निकै चर्को भएको थियो। निर्वाचन प्रक्रियामा शान्तिपूर्ण वातावरणमा मतगणना सम्पन्न भएको र सदस्यहरूको उत्साहजनक सहभागिता रहेको निर्वाचन समितिले जनाएको छ।

“यो विजय मेरो मात्र होइन, अछामका सम्पूर्ण पत्रकारहरूको हो,” रमेश रावतले न्युज कुञ्जसँग कुरा गर्दै भने। “अब हामी सबै पत्रकारको हकहित र अधिकार सुनिश्चित गर्न लागिपर्नेछौं। पत्रकार महासंघलाई अझै सशक्त र प्रभावकारी बनाउन सबैको साथ र सहयोग आवश्यक छ।”

उनले आफूले जितेको मत र विश्वासलाई सम्मान गर्दै जिल्लामा पत्रकारिता क्षेत्रलाई अगाडि बढाउने स्पष्ट योजना बनाउने बताएका छन्। “सक्रिय पत्रकारिताका लागि एकजुट भएर काम गर्नुपर्छ, यो मेरो प्राथमिकता हुनेछ,” रावतले थपे।

जिल्लास्तरीय निर्वाचनको परिणाम सार्वजनिक भइसकेपछि अब प्रदेशस्तरीय र केन्द्रीय समितिको मतगणना सुरु हुने जानकारी निर्वाचन समिति सदस्य तथा नेपाल प्रेस युनियनकी केन्द्रीय सचिव मेनुका ढुंगानाले दिएकी छन्। यस निर्वाचनले अछाममा पत्रकारहरूको नेतृत्वमा नयाँ ऊर्जा र धारको संकेत गरेको छ। अध्यक्ष निर्वाचित भएका रमेश रावतले अब जिल्लाको पत्रकारिता क्षेत्रमा सुधार, विकास, र पत्रकारहरूको हकहितका लागि ठोस कदम चाल्ने अपेक्षा गरिएको छ।